د/ أحمد مستجير ..الأديب المتنكر في صورة عالم

غالباً ما يكون الانسان اللي اهتمامته علمية على العكس تماماً من الانسان اللي اهمامته ادبية
دي بنعتبرها حقيقة مُسَلم بيها ..

حتى ان التعليم الثانوي عندنا قسمين .. قسم علمي ، وقسم أدبي ..
علشان كده كان دكتور أحمد المستجير انسان مثير للدهشة ..

د / أحمد مستجير اتولد سنة 1934 في مصر، ودرس علوم الزراعة

وحصل على شهادة الدكتوراه في التكنولوجيا الحيوية (بيوتكنولوجيا) واستغل مدرس في كلية الزراعة

في جامعة القاهرة وبعدها بقى عميد للكلية من سنة 1986 لـسنة 1995 ..

ونبغ دكتور احمد مستجير في مجال الهندسة الوراثية حتى انه لُقِب بــ " أبو الهندسة الوراثية " ،

وكمان حصل على جوايز متعددة في المجال دا مثلاً زي .. " جائزة الدولة التشجيعية للعلوم والزراعة 1974"
و "جائزة أفضل كتاب علمي مترجم 1993 " و " جائزة الإبداع العلمي 1995"

و "جائزة أفضل كتاب علمي 1996 " و " جائزة الدولة التقديرية لعلوم الزراعة 1996 "

و " وسام العلوم والفنون من الطبقة الأولى 1996 " و " جائزة أفضل كتاب علمي 1999 "

وآخرهم .. جائزة مبارك في العلوم والتكنولوجيا المتقدمة لعام 2001 "

كمان د / احمد المستجير هو صاحب المشروع العلمي الكبير

اللي سماه مشروع «زراعة الفقراء» وهو واحدا من أهم إنجازاته، وبدأ فيه سنة 1989 بمساعدة عدد من المتخصصين في مجال الزراعة ..

وهو عبارة عن مشروع لاستنباط سلالات من القمح والأرز تقدر تتحمل درجات عالية من الملوحة والجفاف،

بهدف الاستفادة منها في زراعة الصحراء في الدول النامية

ومن اهم مؤلفاته العلمية كتاب «النواحي التطبيقية في تحسين الحيوان والدواجن» و«الهندسة الوراثية»، وكمان ترجم العديد من الكتب العلمية في المجال دا

ومن ناحية تانية .. نلاقي د / احمد مستجير مشهور بحبه للأدب والشعر ،

وألف في المجال الأدبي كتب منها .. في بحور الشعر : الأدلة الرقمية لبحور الشعر العربى 1980 و هل ترجع أسراب البط ( ديوان شعر ) 1989 وعلم اسمه السعادة عام 2002.

وكمان نبغ في المجال الأدبي فحاز جائزة أفضل عمل ثقافي في سنة 2000 وكان عضو في مجمع اللغة العربية في مصر واكترمن 12 جمعية علمية وثقافية

وجات وفاته اللي صدمت واحزنت كتير من المصريين ، والعرب لتؤكد انه فعلاً عاش بقلب شاعر

اتوفى دكتور احمد مستجير يوم 17 أغسطس 2006 نتيجة اصابته بجلطة شديدة في المخ بسبب المشاهد اللي شافها من المذابح اللي ارتكبتها اسرائيل في حق المدنين والأطفال اللبنانين ورحل بعد 72 سنة من الابداع والنبوغ

.