لينسز

سنة 1280 لما اخترع الايطالي " سالفينو دويلي أرماتي " النظارات كان اختراعه دا زي ما يكون بلورة سحرية

الناس ما كانتش متخيلة ان في تطور اكتر من كده ، وبرغم ان الناس اللي كان نظرها ضعيف اوي كانت بتلبس " قعر كوباية " زي ما بيقولوا ، لكن كانوا مبسوطين .. أخيراً قادرين يشوفوا الدنيا زي باقي الناس ..

ومن سنة 1280 والعلماء بيطوروا في صناعة النظارات ، عملولها الأول " إطارات " بدل ما كانت بتتمسك بالإيد ..
وطوروا العدسات بقت ارق واخف من ناحية الوزن ، والتطور استمر ولسة مستمر لحد دلوقتي ..

في الفترة دي مابين 1280 لحد دلوقتي ، بالتحديد سنة 1887 قدر الألماني "أدولف فيك" يبتكر العدسات اللاصقة ..

ودا كان تطور مذهل جداً ، العدسات اللاصقة أريح بكتيير خاصة للناس اللي نظرهم ضعيف جداً وبيلبسوا نظارات " سميكة أوي " ، وفرت عليهم التعب الجسماني .. لأن النظارات اللي عدساتها سميكة بتتعب الوجه وبتشيب علامات على الأذنين وعلى الأنف ..
وكمان استريحوا من تريقة اللي يسوى واللي ما يسواش .. وكمان ما بقوش يحسوا في المطرة انهم محتاجين مساحات زي بتاعة العربيات :(

والتطور ما وقفش عند الحد دا .. لأ ، بدأوا يطوروا في العدسات فبعد ما كانت زجاجية بقت بلاستيكية ولينة ..
ودلوقتي بقى في اكتر من نوع من العدسات زي مثلاً :

1 / عدسات لينة : والعدسات دي مريحة اوي في العين لأنها فيها ماية .. لكن من اخطر عيوبها انها ممكن تتراكم عليها شوائب من الجو وتؤذي العين وتعمل لها التهابات .

2 / عدسات يومية : دي بتتغير كل يوم ، ودا بيخلينا نتجنب تراكم الشوائب وبالتالي ما بتسببش أي التهاب للعين .

3 / عدسات شبه مرنة : ودي بقى مصنوعة من السيليكون مع مركبات تانية ، وبتسمح بنفاذ الاكسجين للعين علشان كده هي مش مريحة زي النوعين التانين ، لكن ميزيتها انها فيها كمية قليلة من الماية فبالتالي ما بتنشفش وفي نفس الوقت ما بتجمعش شوائب .

ولازم تخلي بالك من شوية حاجات لو انت لابس عدسات :

اغسل ايدك كويس جداً قبل ماتلبس العدسة وقبل ما تشيلها من عينيك ، ويستحسن تطهر ايدك بكحول او مطهر .

ما تستعملش عدسات خاصة بحد غيرك ، لأن دا ممكن ينقل امراض العين من عينك لعينه والعكس .

لو حسيت بألم في عينيك بعد ما تلبسها واستمر لوقت طويل اعرف انك ما ركبتهاش بشكل صحيح .


احرص على تنظيف علبة العدسات بشكل منتظم.

اقفل علية محلول التنظيف كويس أوي وما تسيبهوش مفتوح أبداً .

احتفظ بمحلول العدسات في مكان معتدل الحرارة ..

ما تنزلش الماية في البحر او في حمام السباحة وانت لابس العدسات .

ما تلبسش العدسات المؤقتة بعد انتهاء صلاحيتها .

لو كنتي بنت حاولي تتجنّبي استخدام أدوات المكياج الخاصة بالعينين،

خاصة اللي بتكون مضادة للماء لأن جزيئات صغيرة منها بتتسرب للعين

واحتمال جداً تتسرب لتحت العدسة وتتراكم تحتها وتسبب التهابات .

*****

والعدسات اللاصقة زيها زي أي اختراع ، بيبقى في الأول معمول علشان ضروري ومع الوقت بيتحول لحاجة كمالية ..

يعني في الأول كانت العدسات الاستخدام الوحيد ليها هو الاستخدام الطبيي الضروري ، دلوقتي بقت تستخدم كنوع من التجميل ، بعد ظهور العدسات الملونة .. وكمان بعد ما بقى سعر العدسات رخيص وفي متناول كل واحد .. علشان كده بقى كل واحد مش عاجبه لون عينيه يروح يركب عدسات ..

يعني الست لو مخنوقة من جوزها تروح تركب عدسات حمرا علشان توريه العين الحمرا ،

ولو واحد عايز يعرف مراته بتبقى صاحية ومفتحة عينها وهو بيتسحب بالليل ولا لأ ، فيجيبلها عدسات فسفوري هدية :D

ولو بنت عايزة تقلب مزة أمريكاني لحد ما تتجوز تضرب لها عدسات زرق وتتظبط :D

وهكذااااااا .......