اتعودنا دايماً نوصف أي حاجة ملخبطة او مش مفهومة ..
مرسومة أو مكتوبة وحش انها سيريالية
والناس دايماً معتقدة ان السريالية هي الاسم العلمي لكل حاجة
بنوصفها بإنها " نكش فراخ " بالعامية الدارجة
لكن دا فيه ظلم كبير أوي للمدرسة السريالية .. لأن كتير من الناس اعتبرتها مدرسة فنية هزلية
وان أي حد حتى لو كان غير موهوب .. يقدر يرسم لوحات سريالية
لكن الحقيقة ان السريالية معناها ( الفواقعية ) يعني ما فوق الواقع .. وهي مذهب حديث في الفن الفرنسي
هدفه التعبير عن العقل الباطن والتصورات والأحلام المكبوتة من خلال صور خالية من المنطق والنظام
واعتمد أغلب الفناين السرياليين على نظريات فرويد .. باعتباره رائد للتحليل النفسي .. خاصة في كل ما يتعلق بالاحلام .
أسس المدرسة السريالية أندريه بريتون وقال عن اللوحات السريالية انها لوحات بتترسم بتلقائية مطلقة
وكأن العقل الباطن هو اللي بيتحكم في فرشاة الرسم وفي الألوان
ودا بهدف التعبير عن اللي بيدور في العقل الباطن للفنان
وكان من أشهر الفنانين السرياليين الفنان الأسباني سلفادور دالي .
نجحت المدرسة السريالية نجاح كبير جداً في الفترة بين سنة 1924 وسنة 1929 وآخر معرض سريالي في باريس كان في سنة 1947 .
وأهم ما يميز السريالية انها اهتمت بالمضمون اكتر من اهتمامها بالشكل
وكانت منبع لاكتشاف رموز وتشكيلات فنية جديدة كتيرة جداً ..
كمان بتتميز بإن الرموز فيها ليها اكتر من مغزى ،
وكل انسان يشوف اللوحة يفهمها بطريقة مختلفة .. على حسب خلفيته العقلية
والظروف اللي مر بيها قبل كده .
هنسيبكم دلوقتي مع عدد من اللوحات السريالية ..
علشان تتأكدوا إن السريالية .. مش نكش فراخ
لوحة سريالية للفنان الروسي فلادمير كوش
من أعمال الفنان سلفادور دالي
من أعمال الفنان سلفادور دالي
ليست هناك تعليقات:
إرسال تعليق