السنة اللي فاتت في شهر نوفمبر ، كنا شغالين - أنا و خمسة بنات اصحابي صحافيات شابات وزي الورد - في القرى اللي حوالين طنطا ، بنعمل تحقيقات عن مشاكلهم في القرى ، و الحاجات اللي مضايقاهم .. في الأيام دي شوفنا العجب :) كنا بنروح أماكن ما نعرفهاش وبنشوفها لأول مرة .. أحياناً كان بيكون معانا دليل من أهل القرية وأوقات كتير لأ ..
وفي يوم من ذات الأيام .. أ / رامي ( رئيسي اللي بشتغل معاه دايماً ) اتأخر .. في حين إن أ / كمال ( رئيسي المؤقت في الشغل دا )
نده " سارة وروضة عايزكم تعالوا "
روحنا .. " سارة وروضة انتوا شاطرين أوي وشغلكم الأيام اللي فاتت لا يُعلى عليه ، علشان كده انا عايزكم في مهمة ماحدش يقدر يقوم بيها غيركم "
- بعد التثبيتة دي أكيييييييييد مش هينفع نقول لأ -
إحنا : " طب بس يا استاذ كمال لما استاذ رامي يجي علشان قال لنا ما تمشوش الا لما اجي ، هنخلص شوية حاجات ونروح "
أ / كمال : " لأ ما هو انا قولتله اني هبعتكم ، بصوا دا هي قرية فركة كعب من هنا كده .. علشان تخلصوا بسرعة وتروحوا بدري النهاردة "
احنا عيننا لمعت و زغللت لما قال لنا هتروحوا بدري :) ظأططنا طبعاً
* احنا رايحين فين ؟
- رايحين صناديد
* يعني إيه صناديد يا أستاذ كمال ؟
- اعملوا سيرش كده اعرفوا عنها ، قبل ما تنزلوا
عملنا سيرش لقينا إن معنى اسم القرية " الأبطال " الشداد أوي يعني ، والقرية اتسمت كده علشان بطولة أهلها في المقاومة الشعبية ومش عارفة ايه
انشكحنا طبعاً :)) بلد زي الفل .. أهلها أبطال قوميين وهييييه
اخدنا الورق والكاميرا واستعننا على الشقا بالله ونزلنا :) .. ركبنا عربية الشغل ووصينا السواق اول ما نتصل بيه يجي فوراً
السواق ثبتنا :D وطبعاً هاجي فوراً
روحنا القرية .. لقينا الناس بتبص لنا أوي ، قولنا عادي ، قرية صغيرة واهلها معدودين أكيد مستغربين احنا مين
يادوبك خطينا جوا القرية لقينا استاذ رامي بيتصل
انتوا فيين ؟ وازاي تنزلوا من غير ما تقولولي ؟
- .............. - سكوت تاااااام
انتوا عارفين البلد اللي روحتوها دي تبقى ايه ؟؟ دي البلد كلها بلطجية ، كل اللي عليهم أحكام بيهربوا فيها
- ايييييييييييييه يالهوي !
طبعاً ركبنا اتحولت لعيدان مكرونة :D
اعتذرنا لأستاذ رامي وقولنا له طب بعديييييين ؟
قالنا هبعت لكم السواق حالاً ولما نيجي نكمل حسابنا
- احنا اخدنا حسابنا كله رعب أصلاً : D -
اتصل بالسواق لقيناه راح مشوار .. بلد بعيدة شبه سفر كده ومش هيجي دلوقتي !! واحنا مضطرين نكمل
قولنا هنتحمل نتيجة غلطنا ، ونكمل ونعمل التحقيق .. واحنا صحفيين يعني جامدين اوي ونفوت في الحديد وولا يهزنا والخ الخ الخ
خطينا خطوتين .. خايفين نكلم حد ، لأن نظرات الناس أصلاً مش مبشرة :D
ميلت على روضة " روضة احنا نروح على الستات .. أكيد لو كل اهل البلد بلطجية الستات هيبقوا حونينين "
روضة وافقت واتجهنا لأول ست ، " مساء الخير معلش يا حاجة هنعطلك شوية " - الحاجة بتزغر لنا -
" ممكن ناخد رأي حضرتك في المشاكل اللي بتعاني منها القرية " - الحاجة برقت لنا -
" انتوا ميييييييييييين ؟ "
- احم ... احنا صحفيين في جريدة أهالينا ، وجايين نعمل تحقيق عن الـ....
" صحفيييييييييين ؟ " صوتها علي ، وجات حاجتين تلاتة كده يتفرجوا
وفجأة حاوطونا كلهم " خلاص يبقى نعمل فيكوا زي ما بيعملوا في الصحفيين في التليفزيون ونضربكم
اييييييييييييه ؟ لأ شكررررررررررررراً يا حاجة بلدكوا زي الفل واحنا مش صحفيين أصلاً
انتي صحفية يا روضة ؟ انا عن نفسي مش صحفية سلامو عليكو يا فكييييييييييييييييييك :D