اطبخي يا جارية .. اطلب الاسعاف يا سيدي

برغم تأكيد الجدات والأمهات المصريات على إن " الطريق لقلب الراجل معدته " بقينا نلاقي بنات  كتير جداً اليومين دول مابيعرفوش يطبخوا !! هل دا معناه ان البنات بقت زاهدة في قلب الرجل ؟؟ ولا ياترى عرفت طريق تاني لقلبه !! وليه ياترى البنات بقت ما تحبش المطبخ ولا تدخله ؟ حاولنا نعرف السبب علشان كده سألنا مجموعة من البنات ..

ياترى بتعرفي تطبخي ولا لأ ؟؟ وليه لو مش بتعرفي ؟؟
و لو بتعرفي ايه رأيك في البنت اللي مش بتعرف تطبخ ؟؟
 والسؤال الأهم .. هتعملي ايه لما تتجوزي وانتي مش بتعرفي تطبخي ؟؟

  .. تعالوا نشوف ردود البنات 

 

بسنت مصطفى (29 سنة ) قالت لنا : انا الحمد لله بعرف اطبخ جدا جدا

بس دي مش شطارة يعني اد ما هو حب للاكل  لأن انا اكتر اكل بعرف اعمله هو الاكل اللي بحبه، رأيي في البنات اللي مش بيعرفو يطبخوا بصراحة انهم ممكن يكونو متدلعين حبتين لان الطبخ عملية سهلة و الله جدا بس محتاج حد حاطط دماغه ف الموضوع و حاسس باهميته و هو مهم طبعا لان تعتمد عليه سعادة اي بنت المستقبلية

.

أما بسمة عبد الباسط (29 سنة ) قالت : بعرف أطبخ وهقولك حكايتى أنا لحد ما خلصت ثانوية عامة ماكنتش بقرب من المطبخ الا علشان اعمل شاى نسكافية قهوة اخرها اسلق بيض اسخن عيش واكله مع اى حاجة لكن كنت بكره موضوع الطبيخ مش عارفة ليه المهم  بعد ما خلصت ثانوية عامة وفى أجازة أخر السنة  قررت أطبخ وكنت كل يوم بالليل أقول لماما بكرة ناوية تطبخى ايه تقولى كذا  أقول لها خلاص هعمله أنا وهكذا بقيت كل يوم أعرف هنطبخ ايه تانى يوم وأعمله لحد الحمدلله ما بقيت بعرف أطبخ كويس، رأيى فى البنات اللى مش بتعرف تطبخ أنهم هما اللى هيتعبوا بعد كده  هما لو بيريحوا دماغهم حالا صدقينى بعد كده هيتعبوا لما يتجوزوا ويلاقوا نفسهم مجبرين يطبخوا ومش عارفين وطبعا تفضل تجرب فى جوزها  وغالبا أول التجارب بتبقى عك وده هيضايق جوزها جداااااااا وبلاش تصدقوا كلام الرجالة لما تتخطبوا لما يعرف انك مش بتعرفى تطبخى

 ويقولك ولا يهمك يا حبيبتى اى حاجة من ايدك حلوة حتى لو عيش وجبنة لانه هينكد عليكى بعد كده مش هيستحمل اكتر من يومين ثلاثة .

 

و آلاء الشيخ (19 سنة ) قالت :أنا بعرف اطبخ يعني .. بنسبة 70 في المية .. أكل مظبوط .. الباقي بقى حاجات مش بعرف أعملها .. أو بعرف بس بكسل.  رأيي في البنات اللي ما بتعرفش تطبخ إنه دلع ..أو ممكن مثلا مامتها مش علمتها قوي .. حاجات شبه دي .. أو بقى انها واحدة دحيحة وموس  فبتفضي نفسها للمذاكرة والدراسة والكلام داا ..  انا  أيام ما كنت مبعرفش يعني .. أو بمعنى تاني بطنش .. كانت اياميها المطبخ  ضيق وصغير .. فكنت بكره نفسي في اليوم اللي بقف فيه في المطبخ ..  كنت بشد في شعري  .. والحاجة بتطلع محروقة ونصها بايظ .. ذكريااات مؤلمة  .. يعني من الآخر متهيألي النفسية من ناحية المطبخ .. هي أكتر حاجة بتخليكي تحبيه أو تكرههييه ..  يعني لازم تكون صافية ورايقة ..

أما لو اتجوزت وانا مش بعرف اطبخ مش هقولك بقى أكل من برا وكلام فاضي من دا .. ولا هجيب خدامة وبتاع وكلام ملوش لازمة ..لأ برضو هفضل ورا نفسي لغاية ما أتعلم .. مع إني لسة مازلت بحرق البسلة والرز .. بس برضو هتعلم .. ومستحيل هيكون في بديل غير كدا .. لأن الحاجة الوحيدة اللي  هيضطر يعملها في حالة اني متعلمتش إنه هيروح لواحدة صاحبه .. ياكل معاه ..

أما إيمان محمود ( 21 سنة ) فقالت لنا : انا بعرف اطبخ وبطبخ كويس جدا الحمد للهأ و طبعا لازم اى بنت تتعلم انها تطبخ لان ده جزء من شخصيتها لانها فى الاول والاخر هتكون زوجة و أم ..

اما البنات بقى اللى مبتعرفش تطبخ فلازم يتعلموا .. وفى حاجه بضايقنى جداً إنى الاقى بنات بتفتخر انها مش بتعرف تطبخ كأن ده برستيج يعنى و دليل على انها مدلعه فى البيت وده طبعا مفهوم غلط  وفى الاول والاخر الطبخ ده فن وحس و ذوق و البنت الشاطره هى اللى تقدر تؤدى كل الادوار باقتدار سواء فى الاعمال المنزليه او شغلها خارج المنزل.

 

وطبعاً بما إن الراجل هو الضحية .. أقصد هو الطرف التاني في الموضوع فكان لازم نعرف
 رأي الأولاد في البنت اللي مش بتعرف تطبخ .. وسألناهم كمان هل بيشترطوا في زوجتهم انها تكون بتعرف تطبخ ولا لأ ؟؟ و ياترى هيعملوا ايه لو اتجوزوا بنت مش بتعرف تطبخ ؟؟ تعالوا كده نشوف قالوا ايه ؟؟

محمد عادل ( 29 سنة ) قال لنا : مش عيب ان يكون في بنات ما بتعرف تطبخ مدام وقتها مشغول في عمل او دراسة او غيره ومعندهاش وقت تتعلم تدخل المطبخ وتتقن فن الطهي لكن لو كان عندها وقت لكده وما اتعلمت يبقي دلع او قله اهتمام من اهلها بتعليمها و طبعا مش شرط اساسي انها بتكون تعرف تطبخ لاني معرفتها بالطبخ مش عامل مهم في اتمام الزواج لا في حاجات تانية اهم كتير من الطبخ  ولو اتجوزت واحدة مش بتعرف تطبخ عادي جدا هخليها تتعلم الظبخ علي اقل من مهلها بمساعدتي وبمساعده والدتها وبمساعده والدتي او اي حد يعني مش مشكلة.

 

 

أما عبد الرازق علي ( 26) سنة قال لنا : مش شرط تكون البنت اللى مش بتعرف تطبخ ست بيت خايبة هى جات على دى وبعدين هتتعلم لان مش هيبقى موجود ماما تطبخلها  والبنت المصريه مبدعه عند الحاجة اول لما تتزنق تظهر مواهبها الدفينه وابدعاتها اما بقى لو اجوزتها مش بتعرف تطبخ  هذا قضاء الله وربنا يدينى الصحة والقدرة على التحمل لحد

ما تتعلم  وبعدين هيا هتبقى فى اسوأ حالتها احسن من اصحابنا اللى اتعلمو فينا.

 

 

و أحمد الدسوقي ( 27 سنة )  قال : البنات تتعلم الطبيخ اكيد الزوج لازم يصبر عليها برضه الانسان محتاج حد يكون جنبه ويشعر بيه مهما كانت الزوج اللى بيحب يصبر وبالنسبة لي الطبيخ  شرط طبعا بس مش ضرورى قوى لان الزوجه لو بتحب الزوج  هتعمل كل شئ علشان ترضيه وهو برضه كذلك و لو اتجوزت واحده مش بتعرف تتطبخ اول شئ اعمله انى هطبخ لنفسى .. و واحده واحده كده تتعلم المهم انها تكون معايا وبتحبنى.

 

 

وكان لازم نعرف تفسير الحكاية دي من علم النفس .. ايه السبب في ان البنت بقت تهرب من المطبخ و تفتخر بكده رغم انه زمان كان من دواعي فخر البنت انها تكون " طباخة بريمو " زي ما بيقولوا .. سألنا د / أشرف وجدي عن رأيه في الموضوع دا من منظور نفسي

تعالوا نشوف قال لنا ايه..

 

 

" البنات بيقولوا انهم ما بيعرفوش يطبخوا عشان  يقولوا انهم تفوقوا علي المجتمع الذكوري اللي فرض عليهم الدور ده قهراً إما لانهم سليلي أسر تحترم المرأة أو انهم متمردون

وبعدين أقولك حاجه ظريفة  مافيش حاجة اسمها مابعرفش اطبخ اصل تحضير الاكل مش قصة

في " مش عايز اطبخ " وكلامي عن الرجال والبنات والدليل اني لو اضطررت لتحضير أكل لشخص  أحبه جدا وانا ماعرفش أطبخ بيطلع كويس ودي خبرة شخصية "

 

دلوقتي بقى احنا مستنين رأيك انت .. ورأيك انتي .. ياترى ايه اللي وصلنا لمرحلة

 ( اطبخي يا جارية .. اطلب الاسعاف يا سيدي (  ؟؟

العيب فينا .. صدقوني العيب فينا

كلنا عارفين حكاية الفلاح الفصيح .. الفلاح المصري القديم اللي اتظلم وجاره جار عليه..
فقرر انه يروح للملك يشتكي له .. وكل يوم يكتب شكوى وينتظر رد الملك لكن الملك ما يردش.
يروح كاتب شكوى جديدة .. وبردو الملك ماردش.
وقعد يكتب في شكاوي يكتب في شكاوي وبعد ما كتب تسع شكاوى بعت له الملك وقال له:
انه هيرد له مظلمته وانه حقق في الموضوع من أول شكوى و ماكنش بيتجاهل شكوته ولا حاجة بالعكس دا كان بيتابعها دايماً وكانت عجباه علشان كده تجاهل الرد علشان يستمتع بالفصاحة الجميلة بتاعة الفلاح .
ولما عرفت إن عدد الاضرابات في مصر تجاوزت الـ 700 اضراب في 2008 في حين وصلت لما يقرب من 650 اضراباً في 2007 ولازال العدد في زيادة مستمرة دا غير الشكاوى اللي تقطع القلب في الجرايد وفي البرامج التليفزيونية و الشكاوي اللي في ادراج الحكومة.
عرفت إن العيب فينا .. أيوة العيب فينا .. مشكلتنا إننا تفوقنا على الفلاح الفصيح في فصاحة شكوانا .. علشان كده المسؤلين في البلد دي مستمتعين بشكوانا.
لكن استبشروا خير يا ناس .. مستوى التعليم المنحدر و الطلبة اللي في الجامعة ومش عارفين يكتبوا اسمهم بتبشرنا بإن قريباً جداً المسؤلين مش هيلاقوا شكوانا بالفصاحة الكافية.
وهيردوا علينا .. وآدينا بنقول يااااااااااااااااارب

_______________________

نشر في مجلة بحلقة بتاريخ 8 مايو 2009

ليه بطوط ما اتجوزش زيزي ؟

رغم تفاهة السؤال الواضحة إلا انه اصعب بكتير من اسئلة كتيرة بنشوفها على القنوات الفضائية الخاصة بالمسابقات اللي بتتفنن في طرح اسئلة غاية في التفاهة والسهولة وبتوصل لحد السذاجة أحياناً و المفاجأة ان الجايزة مئات وآلاف الجنيهات وأحياناً الدولارات والمفاجأة الأكبر إن المتصلين ما بيعرفوش الإجابة وبتوصل لأن السؤال الواحد من عينة " أم هند عندها 3 بنات واحدة اسمها فتكات والتانية عنايات ياترى اسم البنت التالتة ايه ؟ " يستمر لمدة 3 أيام وأحياناً اسبوع بدون حل ، مع إجابات خاطئة مفتعلة جداً والمتصلين اللي هم غالباً بيكونوا تبع القناة بيتفننوا في التغابي .

المشكلة مش بس انه نصب علني ولا إنه استخفاف بعقول الناس واستهانة بذكائهم لأ الموضوع أخطر من كده لأنهم بيعملوا حاجة زي التنويم المغناطيسي لما تقعد تتقرج على القنوات دي .. المذيعات - اللي دايماً بيكونوا لابسين لبس خليع - بيعملوا حركات ليها دلالات مش مهذبة نهائياً دا غير طريقتهم في الكلام اللي بتخليك متضايق وتستفزك وبالرغم من كده مش قادر تحول المحطة


المشكلة الأخطر ان الاطفال بيجذبهم الأسلوب الـ ( عيالي ) بتاع القنوات دي وبيبدأوا يتابعوها ويقلدوا الحركات دي من غير فهم ولا وعي ودي كارثة حقيقية لو لاحظت الاطفال في الحضانة او المدرسة هتلاقيهم بيعملوا حركات أقل ما توصف بيه انها حركات (سافلة ) وليها معاني مش حلوة نهائياً تخليك تحس بالرعب .. لما طفل في كي جي وبيعمل كده لما يدخل ثانوي هيعمل ايه ؟؟!! وتسأل الأهل تكتشف انه بيتابع القنوات دي والأهل مش شايفين خطورة لأن دي في نظرهم مجرد قناة مسابقات وترفيه مش قناة بتجيب حاجات وحشة لا سمح الله !!

السؤال دلوقتي ياترى ايه الهدف من القنوات دي ؟؟

لما نطرح السؤال دا هنلاقي اجابتين

الأولى : الهدف منها تدمير شبابنا و ضياع العرب وتدمير مستقبلنا و... إلخ إلخ ودي إجابة أعتقد إن اغلبنا بيفضل استبعادها لأننا زهقنا من نظرية المؤامرة اللي بقينا نستخدمها في كل حاجة

الإجابة الثانية : (( الربح )) وأعتقد ان دا هو الهدف الحقيقي لأن القائمين على القنوات دي مايهمهمش تدمير شباب ولا يهمهم أطفال كل اللي يهمهم الثروة .. والدليل على كده تزايد القنوات دي بشكل ملحوظ

بدليل ان بعض القنوات الغنائية بدأت تتحول لقناة مسابقات علشان الربح ، والكليبات والمسابقات الأتنين بيدمروا وليهم نفس الأثر السلبي على الشباب والأطفال لو الهدف التدمير يفضلوا كليبات عادي .

الغريب إن في استطلاع رأي في مجلة مجلة الفضائيات (جود نيوز تي في ) لأكثر 10 قنوات هابطة في العالم العربيفي عام 2008

كانت النتيجة كالآتي :

قناة المسابقات والأغاني "سترايك" على رأس القائمة وحصلت على 22% من مجموع الأصوات.

وتلتها قناة " الأمارة" بـ 17 % من الأصوات.

ثم قناة "الجرس" بـ 15% من الأصوات.

وجاءت قناة الأغاني الخليجية "غنوة" في القائمة بـ 14%.

ثم قناة الشات والرسائل "شاتكو" بـ11%.

تليها قناة المسابقات "ميلودي تريكس" بـ 8%.

ثم قناة الأغاني "Etv" بـ 5%.

وقناة "Mtv Arabia" بـ 4%.

ثم قناة "سهم" 2%.

وقناة "ميلودي تيونز" بـ 2%.

لما الناس عارفة انها قنوات هابطة ياترى ليه بتحققق أرباح ؟؟ أكيد في سبب .. تفتكر ايه السبب في رأيك ؟؟

دخول البنات الجيش مساواة أم انتقام ؟؟!!

" من حق الفتاه الالتحاق بالجيش وخدمة وطنها... نطالب بالمساواه "
أول ما تشوف عنوان الجروب دا في الفيس بوك تتشد له جداً وتبقي محتار.. ياترى هل دا فعلاً جروب بينادي بإن البنات تدخل الجيش و بيعتبر دا حق لهم ؟؟ ولا دا جروب للسخرية من مطالبة المرأة الدائمة بالمساواة مع الرجل في كل المجالات حتى لو كانت مش مناسبة ليها .
ساعتها هاتقرر إنك تدخل وتشوف ايه اللي بيحصل جوا .. وهتستغرب جداً لما تلاقي ان اللي انشأ الجروب شاب ، و هاتزيد وقتها جوه عقلك احتمالات ان الموضوع يكون سخرية.. لكن لما تدخل وتشوف بعينك الجروب والمواضيع اللي اتناقشت جواه هتعرف ان الموضوع جد جداً

رغم إن عدد المواضيع المطروحة للنقاش في الجروب 4 مواضيع فقط لكن المواضيع غطت الفكرة من جوانب كتير
مثلاً موضوع : " إن كيدهن عظيم في الجيش أفضل " اللي كتبته... " داليا صبري " اتكلم عن نقاط مهمة جداً
منها أنه : ناقش نقطة الطبيعة الفسيولوجية للبنت وضعف بنيانها وانها ممكن تتدرب تدريبات على الاسلحة الخفيفة والمهارات القتالية اللي تصلح للبنات و العلوم النظرية والادارية التنظيمية
وقالت كمان ان المحتل لما بيدخل بلد مش بيفرق بين بنت و ولد ، بين طفل وشيخ ولا أخضر ويابس
وإن البنات ممكن يبقوا جبهة دفاع داخلية علشان لو لاقدر الله الجيش انهزم ودخل المحتل البلد ما يلاقوش بلد كاملة عزلاء وساعتها الستات هتطبق مبدأ الجيش قالك أتصرف .

وفي موضوع " هل المرأة قادرة على قيادة الجيش؟ " طرح أحمد نصار منشئ الجروب مقال بقلم " فاطمة الحواج "

بيأكد تاريخياً ان المرأة قادرة على قيادة الجيش من خلال قصة " سميراميس " وهي المرأة اللي كانت قادرة على قيادة الجيوش
واقتحام الحصون ... عشان تعرفوا بس أن ما يجبها إلا ستاتها

أما بالنسبة لأعضاء الجروب فوصل عددهم لـ 190 عضو من الشباب والبنات مابين مؤيد ومعارض ومؤيد لكن في حدود .

ولما فكرنا نعمل تحقيق عن الفكرة كنا مهتمين جداً نعرف رأي " أحمد نصار " - 29 سنة محامي اسكندراني - ونعرف هو عايز يوصل بالفكرة لحد فين علشان كده كان لينا معاه الحوار دا :

* الاول يا أحمد عايزين نعرف انت جد في الفكرة دي ولا عاملها من باب السخرية ؟

أحمد نصار : جد طبعا وباعتبر عدم دخول المرأه الجيش من قبيل التمييز ضدها.

* لكن البعض شايفينها انه تمييز ليها انت ايه رايك ؟

أحمد نصار : لو الجيش ده شيء سيء واللى يدخله بيدخله على انه عقاب يبقى تمييز ليها
لكن انا شايف ان دخول الجيش وخدمة الوطن شرف

* طيب في اهالي مش بتحب تخلي بناتها تبات برا البيت وكده تفتكر دا مش هيضايقهم ؟

أحمد نصار : الاهالى دول لو فكروا حايعرفوا ان ده فى مصلحة بناتهم اكتر وبعدين احنا كلنا بيتنا مصر

* في مصلحة بناتهم من ناحية ايه ؟

أحمد نصار : البنت لما تعتمد على نفسها وتعرف انها زيها زى الولد تقدر تنفع وطنها
اكيد حاتقدر تحافظ على نفسها بعد كده وعلى اولادها للأسف الاسره المصريه مسيطره عليها ان البنت انسانه قليلة الحيله

* طيب في ناس بتقول ان البنات بتخدم وطنها بشكل تاني مش شرط الدفاع عنه ؟

أحمد نصار : طبعا ماهى لما ترضع ابنها اللى حايدخل الجيش تكون بتخدم وطنها اه انها بتربى انسان حايدافع عن بلده

* ايوة

أحمد نصار : خلاص انا ممكن اجيب معزه ترضع ابنى وساعتها المعزه دى نعملها تمثال زى تمثال الحرية

* في الجيش الامريكي بيحصل اعتداءات على البنات اللي في الجيش ...

أحمد نصار (( مقاطعاً )) .. وفى الشارع المصرى بتحصل اعتداءات على البنات

* اكيد .. لكن في الشارع البنت هتبلغ هتعمل اي حاجة لكن ف الجيش هتخاف من سلطته عليها

أحمد نصار : البنت حاتبلغ فى الشارع المصرى ؟

انا بشوف كل يوم تحرشات بالبنات واكتر حاجه البنت بتعملها انها ممكن تشتم اللى اتحرش بيها

* بس لما الموضوع بيوصل للي اكتر من التحرش بتبلغ

أحمد نصار : والله برضه فى اغلب الحالات مافيش تبليغ حالات اغتصاب كتيره البنت المصريه بتتعرض ليها ومش بتبلغ لأن فى الشارع المصرى البنت قليلة الحيله بفعل افكار المجتمع بسبب نظرة المجتمع المتخلفه للمغتصبه وانها بتتعامل كانها هى الجانى لكن فى الجيش الامريكى البنت بتقدر تاخد حقها لانها عرفت ازاى تاخد حق وطنها

* طيب في بنات وانا بحاورها اعتبرت ان دخول الجيش بيتنافى مع انوثتها وان البنت اللي عايزة تدخل الجيش تبقى " مش شايفة انها بنت " بالنص قالوا كده !

أحمد نصار : البنات اللى بيقولوا كده اما بيكونوا متاثرين بافكار اهاليهم وخايفين يفكروا اصلا فى البعد عن البيت بسبب القهر النفسى اللى الاهالى بيفرضوه عليهم فبيقولوا نقنع نفسنا بان الجيش غلط او للرجاله بس علشان يحسوا انهم بيعملوا اللى مقتنعين بيه

* طيب في دماغك يا احمد خطوات لتفعيل الموضوع دا يعني تخرج بيه من حيز الفكرة للتنفيذ ؟

أحمد نصار : اه عندى .. ان مصر تبقى دوله مدنيه ، لا يفرق فيها بين الرجل والمرأه وده يتطلب تغيير كبير فى مؤسسات الدوله واولها مؤسسه الرئاسة

* في نقطة أخيرة يا احمد فى شباب بيأيدوا الفكرة من باب انهم شايفين الجيش عقاب و نفسهم ينتقموا من البنات بيه انت ايه رأيك ؟؟

أحمد نصار : هما شايفين الجيش عقاب لان ماعندهمش استعداد يخدموا البلد من اللى شافوه ومن القهر الحكومى ومن استبداد مبارك
لكن لو بياخدوا حقهم فى البلد اكيد حايبصوا للجيش على انه اقل حاجه يخدم بيها بلده لو الناس كلها فهمت ان حماية مصر وحب مصر واجب عليهم زى ماهو واجب عليهم حماية اسرتهم البلد حاتتغير

أما عن رأي البنات لما سألناهم ايه رأيك لو تدخلي الجيش ؟؟ كان ردهم الأتي :

ولاء قالت : " أنا نفسي أدخل الجيش لكن ما ينفعش ان البنات تدخل الجيش ، انا نفسي أدخله لأني شايفة انه هينفعني وهيخليني أقدر ادافع عن نفسي لكن البنات في فكرنا المصري ما ينفعش تدخل الجيش "

أما آية فكان رأيها : " ان البنات ما ينفعش تدخل الجيش لأنها ما تقدرش ، الراجل ليه قوامة معينة على المرأة وما تقدرش البنت انها تتحمل اللي بيتحمله والبنت ليها مسؤليات تانية .. ممكن تبقى ممرضة وممكن تبقى في الاعمال الادارية لكن الضرب و(( الرزع )) ما ينفعش على البنت "

وفي بنات كانت اجابتها مختصرة جداً .. أول ما قولتلهم ايه رأيكم ان البنات تدخل الجيش

أمينة قالت " يا نهار اسود جيش !! "

و شيماء قالت " هم الولاد بيدخلوا لما البنات تدخل ؟!! "

و أما بقى رأي الشباب في الموضوع

فكان رأي عمرو عزت : " لا طبعا انا ضد الكلام دة تماما .. بالعقل كدة الجيش اولا بيحتاج بنيه قويه
وناس تستحمل الظروف دي نفسيا وجسديا ، وطبعا طبيعه البنت زى ماخلقها ربنا مش مهيأه لكدة خالص
خصوصا كمان البنت المصريه المعروفه برقتها وجمالها ..
واحنا بردو طبعا منرضاش ان مكياجهم يبوظ من الشمس ورجليهم تفقفق من المشى وبطنهم توجعهم من الاكل وقلبهم يقف من الخضه .. ومن العذاب اللى بيشوفه المجندين .. احنا بردو رجاله "

و أحمد فريج قال: " البنت ازاي تدخل الجيش وتلبسي الافرول وتشيل المخلة واكيد هتلبس البيادة يعني عايز اعرف تبقي شكلها ايه انا مقتنع باللي قريته وعرفته ان الاسلام صور البنت او المراة زي الجوهرة اللي بنحافظ عليها ابقي انا اجي وابهدلها
من الممكن ان البنت تبقي صف تاني في حالة الجهاد او الحروب زي ما تكون ممرضة او تجهز الجيش او تحمسي الجنود اللي هيحاربوا ثم طبيع البنت وفسيولجيتها تمنعها انها تقوم بالمهام الشاقة بتاعة الجيش دي ده لما بنتفرج علي مصارعة نسائي او بنت بتشيل حديد بتبقي حالة شاذة بالنسبة لينا بالتالي وجود البنت بجوار الولد في الحرب كمجندة شيئ هيبقي شاذ نوعا ما "

و لما سألنا أ / محسن عن رأيه كأب هل يوافق ان بنته تدخل الجيش كان رده :
" ارضى طبعا .. النصف الآخر محتاجه البلد في كل مكان .. بس عايزين بنات رجالة مش بنات نواعم ومش عايزين عياط في الآخر .. وبعدين مش لازم تشيل سلاح ده خليه للضرورة بس يا خوفي في ساعة الجد نسمع صرا"

وأكيد كان لازم ناخد رأي متخصص في علم الإجتماع في الموضوع دا ..

علشان كده سألنا د / محمد سعيد أستاذ الإجتماع بكلية الآداب جامعة طنطا عن رأيه

في إمكانية دخول البنات الجيش فقال لنا " حاجة زي كده مختلفة عن عادات المجتمع المصري لأن المجتمع المصري فيه عادات معينة موروثة للتنشئة الاجتماعية للذكور والاناث فبتكون زي القيود من الصعب تغييرها وأي ظاهرة اجتماعية بتاخد وقت طويل على ما تتكون والتغيير بياخد وقت اطول .. عندنا في مصر في بعض المجالات المجتمع بيبقى شايف ان المرأة ما ينفعش تدخل فيها -رغم دعوات المساواة بين المرأة والرجل - زي بعض المجالات الحرفية زي الميكانيكا والسباكة من الصعب تلاقي سيدات تشتغل فيها .. نفس الشيء بالنسبة للجيش ، المرأة دورها في الجيش محصور في المستشفيات العسكرية مثلا في الحروب اللي خاضتها مصر دورها كان في الهلال الاحمر .. لكن كدور في الحرب نفسها او كتمهيد مثلاً زي ما بيحصل في الدول الآخرى دي حاجة مش شائعة ومن الصعب تقبلها .

ولما سألناه من وجهة نظرك شايف ان المرأة تصلح لدخول الجيش ولا لأ ؟؟ قالنا :

"أي مجال ممكن يصلح لعمل المرأة لأن المرأة دخلت في مجالات كتير واثبتت نجاحها لكن هتاخد شوية وقت علشان المجتمع يعترف بيها في المجال دا ، لكن هي تقدر تثبت نفسها خاصة ان في الاسلام دايماً كانت المرأة ليها دور كبير في الفتوحات الإسلامية "

ياترى بقى انت كشاب موافق ولا لأ ان البنات تدخل الجيش ؟؟

وانتي يا بنوتة تحبي تدخلي الجيش ؟؟ وليه ؟

وتفتكري هيجي اليوم اللي نقول فيه ياريت اللي جرى ما كان و ياريتنا ما دخلنا الجيش ؟؟

أيا كانت النتيجة احنا قدها وقدود ولا ايه يا بنات ؟؟؟

" من حق الفتاه الالتحاق بالجيش وخدمة وطنها... نطالب بالمساواه "
أول ما تشوف عنوان الجروب دا في الفيس بوك تتشد له جداً وتبقي محتار.. ياترى هل دا فعلاً جروب بينادي بإن البنات تدخل الجيش و بيعتبر دا حق لهم ؟؟ ولا دا جروب للسخرية من مطالبة المرأة الدائمة بالمساواة مع الرجل في كل المجالات حتى لو كانت مش مناسبة ليها .
ساعتها هاتقرر إنك تدخل وتشوف ايه اللي بيحصل جوا .. وهتستغرب جداً لما تلاقي ان اللي انشأ الجروب شاب ، و هاتزيد وقتها جوه عقلك احتمالات ان الموضوع يكون سخرية.. لكن لما تدخل وتشوف بعينك الجروب والمواضيع اللي اتناقشت جواه هتعرف ان الموضوع جد جداً وهنا بقي تبقي طبقت شعار مجلتنا المصونه اللي هو " شوفت بعيني محدش قالي "

__________________________________________

نشر في مجلة بحلقة / ابريل 2009