يا ولاد يا ولااااااااااااااااااااااد
إيه إيه إيه ؟؟
تعالوا معانا
ليه ليه ليه ؟؟
علشان نسمع ابلة فضيلة راح تحكي لنا حكاية جميلة
هتسلينا وتوعينا
وتنادي كمان أسامينا
أبـــــــلة .. أبلة فضيلة
***
مين فينا ما بتسريش في جسمه رعشة لما بيسمع الأغنية دي حتى لو كان عنده خمسين سنة ؟؟
مين فينا مش فاكر لما كان بيستنى الساعة 10 إلا عشرة بفروغ الصبر جنب الراديو
يستنى الحدوتة بتاعة أبلة فضيلة .. يستنى الغنوة والحدوتة ؟؟
مين فينا ما غناش معاها .. مين فينا ما فرحش لما سمع في يوم اسمه الأولاني بصوت أبلة فضيلة ؟؟
***
أبلة فضيلة .. الصوت الحنون الدافي .. اللي بيطلع بيك سابع سما ويرسم لك الحواديت
تحس ان صوتها فيه مليون صورة بتترسم .. بترسم ورود وبنت وولد
وقصر الأميرة والملوك والشحاتين
بتحس انك شايف وحاسس وعايش الحدوتة بكل تفاصيلها
***
طب مين فينا عارف مين هي أبلة فضيلة ؟؟
أبلة فضيلة اسمها بالكامل فضيلة توفيق ، وهي أخت الممثلة المعروفة سميرة توفيق
في بداية حياتها درست الحقوق لكن ما قدرتش تحب القانون بصرامته وكلاكيعه ، وفشلت في شغلها كمحامية
اتجهت بعد كده للإذاعة ، وساعدها في كده " بابا شارو " الإذاعي المعروف باهتمامه ببرامج الأطفال وبراعته في تقديمها
اشتغلت أبلة فضيلة في الإذاعة وساعدها صوتها المميز وشخصيتها الجميلة واحترامها لعقلية الأطفال في النجاح
وبقت أشهر مذيعة برامج أطفال في مصر ويمكن في العالم العربي كله
والناس كبار وصغار بقوا بيحبوها
و .... ولا أقول لكم إيه تيجوا نسمع من أبلة فضيلة حدوتة أحسن ..
بس حدوتة النهاردة مش عن الأميرة الحزينة ولا عن الشاطر حسن
حدوتة النهاردة اسمها .. أبلة فضيلة
"كان حلم حياتي ان التحق بكلية الآداب قسم علم نفس
لولا تدخل والدي واصراره علي إلحاقي بكلية الحقوق
وفور تخرجي إشتغلت يوم واحد فقط في مكتب محامي شهير
وفشلت فشل ذريع في عملي كمحامية لأني كنت اتدخل للصلح
وبكيت كثيرا لان احد الاشخاص جاء للمكتب ليشتكي امه
وحاولت اصلاحه ونصحته بان يذهب إليها ليصالحها
فما كان من استاذي إلا ان اعفاني من عملي لانني لن اصلح محامية.
ذهبت للعمل بالاذاعة صدفة.. كما أوصاني أستاذي أحمد باشا المحامي الشهير ،
واثناء اختياري تمنيت تقديم برامج اطفال ففوجئت بأستاذي بابا شارو 'محمد محمود شعبان'
يأخذني من يدي ويسألني ليه عايزة تشتغلي مذيعة اطفال ؟؟
فقلت علي الفور لاني احبهم واحببتهم من خلال برنامجك للاطفال.
تدربت علي يد اساتذة كبار وطلبت من استاذي بابا شارو ان اجلس في الاستديو مع الاطفال لاستمع للحدوتة التي يرويها فوافق علي الفور
وبعد شهور قليلة رشحه وزير الاعلام وقتها عبدالقادر حاتم للعمل في التليفزيون..
لتأتي الفرصة واقدم برنامج الاطفال بدلا منه.
بعد شهور قليلة عاد بابا شاروا للاذاعة مرة اخري..
وفوجئت به يطالبني بالإستمرار في تقديم برنامج الاطفال
لأني - كما قال - بنت موهوبة وفرحت جداً
واصبح بعدها رئيسا للاذاعة وظل معي برنامج الاطفال 'غنوة وحدوتة' حتي الآن رغم ترقيتي الوظيفية لأصل إلي درجة رئيس البرنامج العام.
***
تزوجت من رجل عظيم وكان يعمل كبير مهندسي الاذاعة كان كل حياتي.. وابنتي 'ريم' جعلتني جدة لاحفادي علي ويوسف وهي تعمل مهندسة كمبيوتر مع زوجها في كندا وبعد وفاة زوجي احسست بفراغ كبير فسافرت عندها ولكنني بعد ثلاثة شهور فقط اخذني الحنين إلي مصر فعدت مرة اخري.
زوجي كان أحن مخلوق في الدنيا.. ساندني كثيرا حتي وهو علي فراش المرض .
****
حصلت طوال مشواري الاذاعي علي اكثر من 39 جائزة وتكريما وشهادات تقدير. ولكن احلي تكريم عندما تأتيني رسالة من طفل صغير بحروف مفرطة وخط وحش خالص اشعر بفرحة شديدة وارد علي رسالته فوراً.
***
سافرت كل دول العالم وتعاملت مع الاطفال باحترام واعجبتني نظافة كندا وتمنيت ان تكون مصر نظيفة وجميلة مثل هذه الدول المتقدمة فانا اعشق تراب بلدي مصر
*****
وتوتة توتة .. خلصت الحدودتة.
هناك تعليق واحد:
معنديش ادني فكرة عنها ، بس كل ما اخواتي يجيبوا سيرتها و أسألهم عنها يقولولي انتا من فرافير التسعينات مالكش دعوة اخرس خالص :))
إرسال تعليق