أيوة يوزرين .. زمن الراسين انتهى خلاص .. الراسين دول كانوا بيتوفقوا ايام الخاطبة والحاجات القديمة دي
دلوقتي في عصر الخاطبة الإلكترونية بيوفقوا بين اليوزرات .. مش مهم بقى اليوزر زي الراس بجد ولا لأ
المهم انه الكل بيتسلى وبيستفيد
الخاطبة الإلكترونية تفرق كتيييييير عن الخاطبة التقليدية .. الخاطبة الإلكترونية دلوقتي ليها اسامي شيك جداً ، و اللي عاملينها شايفينها قمة في التحضر ..
والغريب ان الشباب اللي بيلجأوا لها - إن كانوا جادين أساساً - هم هم نفسهم الشباب اللي بيقولوا لأ لجواز الصالونات ولأ للخاطبة
المواقع الالكترونية الخاصة بالزواج انتشرت مؤخراً جداً .. وبقيت كل ما تخطي خطوة في النت تتكعبل في موقع أو في إعلان لموقع منهم
في ناس كتير بتدخل بدافع الفضول مش اكتر وفي ناس بتدخل بهدف التعارف على كتير من الجنس الآخر
المشكلة الحقيقية في الناس اللي بتكون مصدقة وواخدة الحكاية جد .. ودي بقى اللي بتتعرض أكتر للخطر
لأنهم ممكن جداً حد يضحك عليهم ويستغل احلامهم .. وممكن جداً يتنصب عليهم مادياً بردو إستغلالاً لأحلامهم
بحلقة بحلقت في الموضوع دا وأخدت جولة في المواقع دي .. وسجلنا في اكتر من موقع علشان نشوف الدنيا فيها إيه وصورنالكم كل حاجة خطوة بخطوة
هنسيب بقى الصور تتكلم
دي استمارة التسجيل للبنات .. لاحظوا لون البشرة تحت تصنيف المستوى الثقافي !! لا تعليق
دي بيانات الملف الشخصي .. المفترض إنها بتصنف نفسها علشان تسهل الوصول ليها ... ولا سوق العبيد !!
كمان الموقع اللي فوق دا المفروض انه اسمه بنت الحلال وانه موقع زواج إسلامي !
***
على فكرة لاحظنا إن عدد البنات اللي حاطين فيديو ليهم أكتر من عدد الشباب !! ومنهم بنات محجبات كمان !
_______________________________________
طبعاً بعد كل دا .. انت دلوقتي مستعد لإنك تدور على شريك حياتك " التفصيل " بالسنتيمتر كمااااااااااان
طبعاً لا تعليق ..موقع بيقولوا عليه اسلامي وفيه مسيار !
****
دا كان بيوزر البنت اللي عملناه .. أما عن يوزر الشاب بقى فخطوات التسجيل واحدة تقريباً
لكن في حاجة مستفزة جداً حصلت واحنا بنشتغل لقينا الرسالة دي نطت في وشنا
السعر مغري جداااااااااااً .. مش بقولكم ولا سوق العبيد !
أما بقى اكتر صفات الناس بتدور عليها .. او الناس اللي سوقهم ماشي بقى اليومين دول هم
مش عارفة ازاي بيدور على واحدة خجولة ومؤمنة في الموقع دا !!
خرجنا بقى من بنت الحلال وروحنا لموقع تاني .. السمسرة فيه على عينك يا تاجر
أما بقى الموقع دا كان اسمه زواج كام ..
احنا مش هتكلم ولا نقول هو المفروض يتوصف بإيه لأنكم أكيد هتعرفوا بعد ما تشوفوا الصورة دي
آخر حاجة بقى ..او آخر نكتة .. موقع اسمه مودة نت .. اسلامي متشدد جداً المفروض يعني
وعامل حاجة جميلة خالص جداً لما تيجي تسجل .. دا علشان هو متشدد
اتفرجوا معاااااااااانا
كانوا المفروض يعملوا تقنية لو الموقع ما سمعش صوتك بنفسه وانت بتقول القسم ما يقبلكش :D
المهم .. سجلنا ، ونفس الحدوتة بردو البنات بتوصف نفسها عااااااااااااااادي مافيش أي مشكلة
وممكن جداً البنت تحط صورتها .. عاااااااااادي .. رؤية شرعية
او بحلقة شرعية بقى في الصورة :D
بس الحق يتقال هم حذروا البنات من الشباب " الشريرين " اللي بيغرغروا بالبنات
أما بقى من قصص النجاح على الموقع .. اكتفيت بصورة توضح لكم قد ايه الموضوع دا استهبال
بعد 24 يوم قدرت تلاقي البني آدم المناسب ؟؟ أي بني آدم دا اللي ممكن تتعرف شخصيته في 24 يوم ولا في 3 ايام ؟؟
ولا النكتة الكبيرة بقى دي
بعد صفر يوم من تسجيلها !! يعني اتكعبلت في اليوزر بتاعه وهي لسة ع باب الموقع !!
***
الموضوع لسة ما خلصش .. الأسبوع الجاي هنكمل كلامنا عنه .. وهنشوف آراء الناس إيه في الحكاية دي
ليست هناك تعليقات:
إرسال تعليق