في مصر وفي الوطن العربي بشكل عام إنك تروح لورا الشمس دي حاجة سهلة جداً خالص .. أسهل من إنك تروح مصلحة حكومية
أينعم هو كله حكومة .. بس تفرق !
عايز تروح ورا الشمس ؟؟
سهلة أوي : افتح بقك .. اعترض
اقف في أي مكان عام وقول رأيك في اللي بيحصل في البلد بصراحة .. مش لازم كمان مكان عام اوي
ممكن في الكلية .. في المدرسة ، في مكان شغلك
ممكن حتى تفتح بقك في ورقة الامتحان وتقول رأيك بحرية .. تفتح مدونة وتقول فيها اللي عايز تقوله
وممكن بردو تروح ورا الشمس لو شوفت حاجة مش المفروض تشوفها ، وروحت قولت كلام مش المفروض تقوله
طبعاً الكلاااااااااااام واضح
ممكن كمان بدل ما تفتح بقك ، وبقك يوجعك .. تربي دقنك وتصلي أول بأول في المسجد
وياسلام بقى لو قعدت شوية في المسجد بين كل صلاة وصلاة تقرا قرآن ..
ياااااااااااااااادوبك دقنك توصل عشرة عشرين سنتي وهتلاقي " ورا الشمس " بذات نفسه بيخبط على باب بيتكم باليل !
مش شرط كمان تكون بتتكلم في السياسة لأ .. الكلام دا كان موضة وبطلت ..
دلوقتي لو ظابط أو حتى أمين شرطة وقفك في الشارع ومرمط بكرامتك الأرض
لازم تسكت والا تروح ورا الشمس !
لو حتى لقيته داخل بيتكم .. اتكلم وارفض واعترض وقول له فين إذن التفتيش
وساعتها مبرووووووووووك عليك ورا الشمس !
ممكن كمان تروح ورا الشمس من غير ما تكون عملت أي حاجة من دول .. أيون
ممكن تكون موجود في مكان فيه ناس مش عاجبين السيادة .. ناس كده مالهمش خير في " حاتم " و السيادة تكون قررت تاخدهم
ورا الشمس علشان " يغيروا جو " فتروح معاهم .. ما انت مسعود بقى !
المهم في الآخر توصل لورا الشمس .. ماهي تعددت الطرق وورا الشمس واحد
السؤال دلوقتي بقى .. ورا الشمس دا فييييييييين ؟؟
ورا الشمس ماشاء الله براااااااااااااااح .. أكتر 51 سجن ومعتقل ، بيساعوا من الحبايب يجي مليون ألف
عندك مثلاً سجن القطا (ديتك جاروف وحفره وعسكري يدفنك ) وعندك سجن أسيوط العمومي .. وعندك سجن دمنهور العمومي ممكن تقعد فيه 100 سنة وماحدش يعرف عنك أي حاجة .. عندك كمان سجن مزرعة طرة .. ودا بقى اللي دايماً بيرموا فيه المدونين ،
وعندك سجن وادي النطرون .. وعندك طرة.. وعندك معتقل الوادى الجديد.. اللي بيسموه " عاصمة جهنم "
وغيرهم وغيرهم .. طبعاً في حاجات ما نعرفش أساميها .. أيون عاملينها لنا
"surprise "
الجميل في الموضوع إنك انت اللي بتختار سجنك بإيديك
أيون .. انها بلد ديموقراطية
على حسب عملتك يتحدد مكان رميتك !
أما بقى ايه اللي بيحصل ورا الشمس فدا كلام تاني هنكمله المرة الجاية
بس يارب تقروه "في بحلقة" مش " مجلة صوت سجناء طرة "
:D
هناك تعليقان (2):
انت نسيتي تقولي دمووا
وانا يعز علي تنسي بلدي
طول عمري كنت افكر ورا الشمس دي بعيده
اتاريها خطوتين
ساره معاك حق بس اشوف الصورة ليست بهذا السواد لاننا لم نصل للعراق بعد
والدليل كتير جدا مربيين لحيتهم وفي المنهج السلفي وبيحضروا دروس لشيوخ سلفيين
ولهم بعض المشروعات والنشاطات الدعوية ومافي اذية الحمدلله
ومنهم اخواني واقاربي
وكثير من معارفنا وهذا لايمنع من وجود أذى فعلا
وبرضه في كثير بيقولوا رأيهم ويعترضوا ولا يتأذوا وبرض1ه في كثير بيقولوا ويعترضوا ويتأذوا
مش عارفه بصراحه ايه الضابط في المسألة
هقولك هو يمكن يمكن يمكن
همه كتير بالنسبه للي بيدخل السجن وقليل بالنسبه لمجموع الشعب ههههههه
دمت بخير ياساره
إرسال تعليق