علي أمين .. الصحفي والإنسان

" علي أمين .. الصحفي والإنسان " دا عنوان كتاب صدر عن دار الهلال 

الكتاب دا فيه تجميع لكل المقالات اللي اتكتبت عن الراحل علي أمين بعد وفاته

كل صحفي في الدنيا نفسه يشتغل صحافة بجد ويحبها ويخلص لها

لازم يقرأ الكتاب دا ، وكل انسان يائس ومحبط ومكسل يشتغل لازم يقرا الكتاب دا

بجد علي أمين دا كان اسطورة

اسطورة في عشق الصحافة .. هو اتولد علشان يكون صحفي وبس ، كأنه بيتنفس صحافة

ومات والقلم في ايده وكان بيخلص مشروع لجورنال جديد بفكرة جديدة

كان زي الطاحونة في الشغل ، في كل وقت وفي كل مكان بيفكر وبيطور في الصحافة

وبمجرد ما تقرأ عنه بس هتصيبك عدوى الحماسة وحب الصحافة

فتخيل بقى لو كنت قابلته ؟ 

حاولت أدور على الكتاب علشان تقرأوه معايا وتستفيدوا لكن للاسف مش لاقياه على النت :(

يوميات صحفية تحت التمرين 1

الصحافة قالوا عنها مهنة البحث عن المتاعب

عملت نفسي شجيعة وقلت نحن لها

قلت هى محتاجة ايه يعنى ؟

شوية نشاط وشوية خفة حركة

وشوية برود وتباتة

(( ايوة اكيد امال هنزن على دماغ الزبون ازاى لحد ما يقر ))

المهم لأنى عاشقة ترابها

قررت اقتحم المجال دا

بجد لقيته صعب بدرجة رهيبة

بس لذيذ بطريقة لا يمكن تخيلها

والصحافة اجمل مافيها انها بتتعامل مع الناس

فكل يوم .. وممكن كل لحظة بتلاقي نفسك جوا حكاية جديدة

حكاية تفرح وحكاية تزعل وحكاية تجيب الضغط

هحكي كل شوية كده عن حكاياتي وانا صحفية تحت التمرين


وهبدأ من الصفر ..

((( ازاى الاقى جريدة اتدرب فيها )))

دا كان اول هدف ..

انا وصاحبتى عندنا امل كبير شوية

رحنا بكل ثقة وبكل فكاكة

على مكتب الاهرام

ودخلنا دخلة جامدة

بصراحة شفنا ناس قلنا لو دول صحفيين

يبقى الشغلانة مش جايبة همها

المهم قابلونا بحفاوووووووووة ((((( احم احم لازم نقول كده عشان منظرنا يعنى )))))

وادونا ميعاد مع مدير المكتب

قالولنا بصوا انتوا ماتجوش تانى انتوا اريحلكم اتصلوا بيه


نتصل امتى ؟

بعد الساعة 4.5


روحنا البيت وكلنا امل فى الحياة

واحلام

وكل واحدة سجلت التاريخ فى اوراقها

وعشنا فى الدور


وفى الاخر عرفنا سر 4.5


بكل بساطة 4.5 المكتب بيقفل

والتليفون يرن يرن

يرن يرن

يرن يرن

يرن يرن


(((( حاضر هانجز اهو بلاش ضرب )))

يرن يرن

يرن يرن

ومااااااافيش اى امل




وكانت اول صابونة ناخدها فى حياتنا

واحنا لسة ياعينى شباب زي الووووووووورد

بعد كده اخدنا على الغلاسة والتباتة


وكل مانقابل جريدة

ندخل نرخم

ونسألهم على تدريب


لحد فى يوم من ايام الاسبوع

وشهر من شهور السنة

لقينا تدريب


الناس قابلونا بجد كويس

وشفت لأول مرة فى حياتى


(((( رئيس مجلس الاداااااااااااااااااااااااااااارة ))))




بعد ما قابلنا الناس الجدعان دول قررنا نشتغل بقى

بعد كام اجتماع نظرى دخلنا فى الجد

وهانشتغل بجد

ماكناش مصدقين نفسنا ؟

وااااااااااااااااااو هنشتغل صحفين ؟

هنقابل ناس ؟

هنقول اللى فى نفسنا ؟

كان بجد اسعد ايام حياااااااااتى

جزء من الشغل اللى هنعمله هو زيارة دار ايتام

بمناسبة يوم اليتيم

رحنا زرنا دار فى يوم اجازة

عشان نقابل الاطفال

كان تانى يوم بعد يوم عيد اليتيم

رحنا الدار من طريق غلط

فبدل ما ندخل من الباب الامامى


رحنا من باب الجنينة

المهم واحنا بنرن الجرس

سامعين الاطفال بيشتغلوا فوق

بينضفوا الدار

وزعيق وكده

بس لما جات الدادة تفتح الباب وعرفت احنا جايين من اى جريدة



كل الاصوات هسسسسسسسسسسسسس


وقالتلنا قابلوا مديرة الدار

الست قابلتنا وحش جدا

وبصدة نفس

ومش عايزة تتكلم

لما كنا هنعيط خلااااااص

وبعدين قلنلها طب عايزين نقابل اطفال


الست وشها جاب الوان وقالتلنا لأ اصلهم نايمين

مرهقين يا حبايبى من الحفلة امبارح

طبعا احنا عارفين اللى فيها

قلنالها مش معقولة يناموا طول النهار هنستناهم يصحوا

قالتلنا طب تعالوا يوم تانى

قلنالها لأ مش هاينفع عشان احنا مش من هنا

زي ما تكون الكلمة جاتلها طوق نجاة

قالتلنا طب روحوا وتعالوا كمان ساعتين تلاتة


هى قالتها على اساس اننا مش هنقعد فى الشارع فهنزهق ونروح


بس ميييييييييييييييييييييييييين

اتمشينا فى عز الظهر والشمس ورجعنالها تانى


كانت هتقتلنا

بس قابلنا الاطفال اخيراااااااااااااااااااااااا



دا بقى هاحكيلكوا عليه بعدين

بس دلوقتى هاقولكم سر المعاملة

السر فى ان الجريدة اللى احنا فيها كشفت الحاجة قبل كده كذا مرة

فقلبها شايل ومعبى ومش طااااااااااااايقة تشوف حد منها



واحنا جداد


واحنا مانعرفش

واحنا روحنا فى داهية



ههههههههههههههه

كفاية كده النهاردة لو كملت اليوميات هبقى احكي عن التحقيق بتاع " المهنة بدل حائط "

وعن اما روحت السيد البدوي

ولا اختلاف الأذواق .. لبارت المزز

الجمال مفهوم نسبي بيختلف من انسان لإنسان تاني .. وبيختلف من زمان لزمان

يعني اللي انت شايفه جميل جداً ومبهر ممكن أوي غيرك يعتبره عادي أو وحش .. وبناء على الكلام دا ، جمال المرأة كمان شيء نسبي

يعني البنت اللي انت شايفها جميلة جداً ممكن أووووي صاحبك يشوفها عادية أو وحشة 

علشان كده مافيش حاجة اسمها " أنثى قبيحة " لأن لكل أنثى نوع من الجمال ..

و على مستوى الشعوب بردو اختلفت مقاييس جمال المرأة من شعب لشعب

مثلاً عند العرب البنت الجميلة بالنسبة لهم هي اللي تكون بشرتها بيضاء وقوامها يكون مليان شوية

وعيونها واسعة وشعرها أسود  فاحم وطويل

أما في الغرب فبالنسبة لهم المرأة كل ما كانت طويلة ورشيقة كل ما كانت جميلة

وبيفضلوا الشعر الأشقر والأكتاف العريضة والشفايف تكون عريضة ومنفوخة

أما في الصين فليهم دماغ تانية خالص .. هم سابوهم من الشعر والطول واللون والكلام دا كله

وركزوا على الرجلين .. كل ما كانت أقدامها صغيرة كل ما كانت جميلة بالنسبة لهم وكان دا دليل على رقتها

وهم على عكس الغربيين بيعتبروا الطول عيب مش ميزة  - عمرك شوفت أساساً حد طويل هناك ؟!!

 أما بقى شعب الإسكيمو والهنود الحمر فركزوا على" الريحة  " أهم حاجة في البنت تكون ريحتها جميلة

بالذات الفم والشعر ، وعلشان كده بيهتموا جداً بتعطير جسمهم وشعرهم

وقبل ما يخطب أي واحد أي واحدة لازم يخلي الخاطبة تشم ريحة بقها

يعني متهيألي هناك كلورتس عامل أحلى شغل :D

أما في بعض القبائل الإفريقية فبالنسبة لهم البنت أجمل كل ما كانت بشرتها أكثر سواداً لأن دا دليل على أصالتها 

وكمان مش بيحبوا الشعر الطويل وكل ما كانت " أصلع " كل ما كانت أكثر أنوثة وجاذبية !!

بصراحة مريحين ستاتهم لا شامبوهات ولا كريمات تفتيح بشرة يعني قمة في الرفاهية  !

 الأذواق زي ما شوفنا بتختلف لكن كلها بتشترك في حاجة واحدة .. ان كل شعب بيشوف الجمال في الأصالة 

 كل شعب بيحب البنت اللي جمالها أصيل وطبيعي شبه بيئتها ..

 يعني ما ينفعش بنت تحاول تكون جميلة في الشرق بمقاييس الغرب .. ولا تكون جميلة في افريقيا بمقاييس الصين !

إيه اللي بيحصل ورا الشمس ؟؟

اللي بيحصل ورا الشمس يكاد يكون مجهول ، لأن الداخل مفقود .. زيه زي الموت كده

ماحدش بيرجع علشان يقول بيحصل ايه هناك ، فاحنا ما نعرفش ايه بيحصل هناك

 كل اللي نعرفه  عن اللي بيحصل ورا الشمس بيكون من خلال استغاثات المعتقلين واللي بيقولوه لأهلهم ،

أما الناس سعيدة الحظ بقى اللي ربنا كتب لها عمر جديد ورجعت من هناك

فغالباً بتكون شافت أقل حاجة ممكن تتشاف ورا الشمس ، لأن اللي بيشوف الــ " عرض الكامل " عمرهم ما بيسيبوه يخرج

 بيقولوا ان في أكتر من 105 طريقة للتعذيب  ، بتتراوح ما بين  المهينة ، والمؤلمة ، واللا-إنسانية

يعني أقل حاجة هناك انهم مثلاً يمنعوك من دخول الحمام ، او انهم يمنعوك من النوم ، أو الأكل 

أو مثلاً يخلوك تنام من غير غطا ولا فرش في عز الشتا ، أو تنام في زنزانة ريحتها بشعة أو مخصصة للكلاب

أما بقى لو كانوا بيعزووووك أوي بقى فمش هتقدر تغمض عنيك وهتشوف اللي عمرك ما شوفته

ممكن مثلاً  يكسرولك ضلوعك أو يحشروك جوا تلاجة  ، او  يضربوك ع معدتك

  وكتير بيستعملوا اسلوب الضغط على الخصيتين  و الرش بالغاز الخانق
  وممكن يخلعوا دراعك من مفصل الكتف أو يجرجروك ع السلالم وهم مغميين عينيك
  أو يرشوا في عينيك غاز او يجبروك تعمل حمام قدام الباقيين .. يعني إهانة تلاقي
  بهدلة تلاقي ، تدمير جسم وعاهات تلاقي .. مش حارمين أي حد من أي حاجة
  نحن نختلف عن الآخرين والتميز والإبداع شعارنا 

وكل دا ليييه ؟؟

 كل دا علشان ياخدوا منك معلومات ، أو علشان يجبروك تعترف على حد تاني بجريمة ما ارتكبهاش أو علشان يلفقولك إنت شخصياً تهم توديك في ستين داهية

وساعات بتكون مجرد مجاملة لحد من حبايبهم انت ضايقته أو مش عاجبه 

والسبب الأهم من دا ودا ، اللي قاله فرعون لما سألوه إيه فَرعنك؟

" علشان مالقتش حد يردني "

 ****

لمْ أكُ أعمى..

ولكنَّهم أرفقُوا مقلتي ويدي بمَلَفِّ اعترافي

لتنظرَه السلُطاتُ..

فتعرفَ أنِّيَ راجعتهُ كلمةً.. كلمةً..

ثم وَقَّعتُهُ بيدي..

- ربما دسَّ هذا المحقِّقُ لي جملةً تنتهي بي الى الموتِ!

لكنهمْ وعدوا أن يُعيدوا اليَّ يديَّ وعينيَّ بعدَ

انتهاءِ المحاكمة العادِلة!

______أمل دنقل  ________________________

 أبانا الذي في المباحث ... نحن رعاياك

باق لك الجبروتُ

وباق لنا الملكوت

وباق لمن تحرس الرهبوت

______أمل دنقل  ________________________

 

تيجي نروح ورا الشمس ؟؟

في مصر وفي الوطن العربي بشكل عام إنك تروح  لورا الشمس دي حاجة سهلة جداً خالص .. أسهل من إنك تروح مصلحة حكومية

 أينعم هو كله حكومة .. بس تفرق !

 عايز تروح ورا الشمس ؟؟

سهلة أوي : افتح بقك .. اعترض

 اقف في أي مكان عام وقول رأيك في اللي بيحصل في البلد بصراحة .. مش لازم كمان مكان عام اوي

 ممكن في الكلية .. في المدرسة ، في مكان شغلك

ممكن حتى تفتح بقك في ورقة الامتحان وتقول رأيك بحرية .. تفتح مدونة وتقول فيها اللي عايز تقوله

وممكن بردو تروح ورا الشمس لو شوفت حاجة مش المفروض تشوفها ، وروحت قولت كلام مش المفروض تقوله

  طبعاً الكلاااااااااااام واضح

ممكن كمان بدل ما تفتح بقك ، وبقك يوجعك .. تربي دقنك وتصلي أول بأول في المسجد

وياسلام بقى لو قعدت شوية في المسجد بين كل صلاة وصلاة تقرا قرآن ..

ياااااااااااااااادوبك دقنك توصل عشرة عشرين سنتي وهتلاقي " ورا الشمس " بذات نفسه بيخبط على باب بيتكم باليل ! 

مش شرط كمان تكون بتتكلم في السياسة لأ .. الكلام دا كان موضة وبطلت ..

دلوقتي لو ظابط  أو حتى أمين شرطة وقفك في الشارع ومرمط بكرامتك الأرض 

لازم تسكت والا تروح ورا الشمس !

لو حتى لقيته داخل بيتكم .. اتكلم وارفض واعترض وقول له فين إذن التفتيش 

وساعتها مبرووووووووووك عليك ورا الشمس !

ممكن كمان تروح ورا الشمس من غير ما تكون عملت أي حاجة من دول .. أيون 

ممكن تكون موجود في مكان فيه ناس مش عاجبين السيادة .. ناس كده مالهمش خير في " حاتم " و السيادة تكون قررت تاخدهم

ورا الشمس علشان " يغيروا جو " فتروح معاهم .. ما انت مسعود بقى !

 المهم في الآخر توصل لورا الشمس .. ماهي تعددت الطرق وورا الشمس واحد

السؤال  دلوقتي بقى .. ورا الشمس دا فييييييييين ؟؟

 ورا الشمس ماشاء الله براااااااااااااااح .. أكتر 51 سجن ومعتقل ، بيساعوا من الحبايب يجي مليون ألف

عندك مثلاً سجن القطا (ديتك جاروف وحفره وعسكري يدفنك ) وعندك سجن أسيوط العمومي .. وعندك سجن دمنهور العمومي ممكن تقعد فيه 100 سنة وماحدش يعرف عنك أي حاجة .. عندك كمان سجن مزرعة طرة .. ودا بقى اللي دايماً بيرموا فيه المدونين ،

وعندك سجن وادي النطرون .. وعندك طرة.. وعندك معتقل الوادى الجديد..  اللي بيسموه " عاصمة جهنم "

 

وغيرهم وغيرهم .. طبعاً في حاجات ما نعرفش أساميها .. أيون عاملينها لنا

 

"surprise "

 

الجميل في الموضوع إنك انت اللي بتختار سجنك بإيديك

 

أيون .. انها بلد ديموقراطية

 

على حسب عملتك يتحدد مكان رميتك !

 

أما بقى ايه اللي بيحصل ورا الشمس فدا كلام تاني هنكمله المرة الجاية

 

بس يارب تقروه "في بحلقة" مش " مجلة صوت سجناء طرة " 

:D