فريق بساطة .. مزيكا وغُنا من هنا

فريق بساطة .. فريق شعاره " مزيكا وغُنا من هنا ، هنغنى للحب ... والحاجات التانية"

فريق بساطة زهقوا أوي من الأغاني اللي بتتكلم بس عن الحب والهجر والفراق ، زهقوا زي كل حد زهق

لكن الفرق انهم لما زهقوا قدروا يقدموا جديد ..

وبيحكوا لنا عن ميلاد فريق بساطة وقالوا : " نبيل لحود..غاوى مزيكا و بيعزف عود ويلحن .. وبنته "ماريز" بتغنى وبتدرس فى المعهد العالى للموسيقى العربية ...قسم عود. "إيهاب عبد الواحد" صديق العيلة .. ملحن وعازف جيتار وكان بيغنى مع "ماريز" فى مدينة الرحاب لغاية ما إختاروهم يعملوا أغانى مسلسل حنان وحنين ..
للفنان عمر الشريف فى رمضان 2007 .. لحنها إيهاب عبد الواحد وغناها هو وماريز .. إتعرفوا على الشاعر إسلام حامد ولقوا عنده كلام مختلف .. جيتار و عود و شاعر ... إيهاب و نبيل و إسلام...
دندنوا سوا حبة أغانى .. وإندمجوا جدا .......

قلبت بجد .. فكروا يعملوا حاجة ببساطة ...
وجت الفكرة .. إنضم عليهم "إيهاب سمير" (قسم شيللو) و "محمد سعد" (قسم عود) زمايل "ماريز" فى المعهد .......

... بقت فرقة .
و فى شهر مايو من عام 2009 إنضم الى الفرقة عازف الإيقاع رائد سيكا بعد إعتذار محمد سعد عن الإستمرار فى الفريق "


فريق بساطة مكون من :
إيهاب عبد الواحد : - ملحن ومغنى وعازف جيتار ، ماريز : - مغنية و عازفة جيتار و عود ، إيهاب سمير : - عازف شيللو ، رائد سيكا : - عازف كاخون و إيقاعات ، نبيل لحود : - ملحن ومغنى وعازف عود .. وشعراء الفريق .. إسلام حامد ، د.سامى رفاعى ، محمد سرحان ، عادل سلامة ، وديع لحود ، عبد الحميد الحباك ، كمال كامل ، سالم الشهبانى ، هشام الجخ ، رمزى بشارة


و قد م اغاني كتير جداً في ساقية الصاوي و في القلعة وفي المركز الدولي للتنمية الثقافية وفي اماكن كتييييير جداً آخرها أسبانيا ... واغانيهم اتكلمت عن مواضيع مختلفة وماحدش غنى لها قبل كده .. فريق بساطة غنى لأبلة فضيلة ولــ " طابور المدرسة " وغنوا للبنت المصرية الجدعة اللي شبههوها بالبونبوناية ،، اغانيهم كسرت الدنيا ونجحت جداً وليهم مستمعين كتير من الشباب ، واثبتوا ان " الجمهور عايز كده " مش عايز هلس وكلام فاضي ..

لو عايز تسمع أغاني فريق بساطة .. تقدر تدخل هنا ، ولو عايز تتابع آخر اخبارهم انضم لهم من هنا

هل ولاد الأقاليم فئران تجارب للحكومة ؟؟

واحنا بندعبس في الجرايد شوفنا خبر .. المفروض انه يفرحنا تقريباً .. والمفروض اننا نظأطط ونقول الدنيا بتتطور وتعليمنا بيتظبط والدنيا فللي ..

الخبر كان بيتكلم عن تصريحات وزير التربية والتعليم بخصوص المناهج الجديدة المعدلة .. وان الوزارة عايزة المناهج ما تبقاش حكر - حلوة حكر دي ؟؟ - على المصريين .. لأ دي كمان هتخليها حاجة عالمية- من حلاوتها - وأي حد حتى لو مش مصري ممكن يستعينوا بيه علشان يألف المناهج - علشان تبقى حتى المناهج مستوردة - ماااااااااااعلينا

بغض النظر عن اننا عمالين ننفخ في قربة مخرومة بقالنا مليون سنة ونقول لهم يا ناااااااااس عايزين مناهج مرتبطة بالبلد دي .. مناهج تحسس الطلبة ان اللي بيدرسوه دا ليه دعوة بحياتهم .. ما تبقاش المناهج في وادي والواقع اللي عايشينه في وادي .. بغض النظر عن دا كله ؛ لفت نظرنا في تصريحات السيد الوزير حاجة كده .. حضرته بيقول بالنص :

"وسيتم تطبيق المناهج الجديدة بمواد الرياضيات والعلوم واللغة الإنجليزية، بدءا من عام 2010/ 2011 فى 3 محافظات هى الإسماعيلية والفيوم ومدينة الأقصر، ضمن ما يعرف بخطة "لا مركزية التعليم"، والتى ستعممها وزارة التربية والتعليم على باقى المحافظات فى حال نجاحها. "

حاجة تقرس بصراحة .. تحسسك ان ولاد الأقاليم دول فيران تجارب .. لو نجحت هنعممها .. ولو فشلت يلا مش مهم كام ( ..... ) وراح ..

مش قادرين نفهم بجد هم ليه بيتصرفوا في مستقبل الطلبة كده كأنهم لعبة ؟؟ من قديم الأزل وهم تطق في دماغهم فكرة يلا نطبقها على الدفعة دي ... ويقعدوا يجربوها خمس ست سنين وبعدين ياااااااااااااي دي فشلت

يلا نجرب غيرها ... ست سبع سنين يااااااااااي دي فشلت بردو ، تيجوا بقى نرجع القديمة ؟!!

قمة الاستهتار بمستقبل الشباب ، ويجوا في الآخر يقولوا مش عارفين نشغلهم اصلهم يااااي مستواهم التعليمي مش قد كده مش مناسب لمتطلبات سوق العمل

امتى يامصر يبقى فيكي مسؤولين فاهمين يعني ايه مسئولية .. ويعني ايه رعية ؟؟

امتى يدرسوا قرارتهم مليون مرة واحتمالات النجاح والفشل ويتعبوا عليها بجد قبل ما يطلعوها للشعب الغلبان ؟؟

امتى يبقى في احترام للبشر اللي عايشين في محافظات غير محافظة القاهرة الكبرى ؟؟

تفتكروا امتى ؟؟؟

نشر في مجلة بحلقة بتاريخ 5 أغسطس 2009

أيون . دلوقتي رشا و وائل بيخلفوا عبعااااال

موضة زمان ما رجعتش في اللبس والستاير وتسريحات الشعر وبس ... لأ دي رجعت وبقوة في اسامي الأطفال ..

موضة ان الولد لازم يتسمى على اسم جده والبنت على اسم جدتها مهما كان الاسم ..

دلوقتي بقى طبيعي اوي لما تسأل طفل " اسمك ايه ياحبيبي "

يقولك : " عبد الجواد تامر عبد الجواد " او " عوضين رامي عوضين "

وغيرها من الأسامي اللي احياناً الطفل نفسه بيكون مش عارف ينطقها اصلاً

وتلاقي نفسك مندهش من الاسم دا لطفل اتولد في 2005 ولا 2003

منى عادل - مديرة دار براعم الايماان للحضانة - قالت لنا : بحكم شغلي كمديرة للحضانة فانا اللي بستلم ورق كل طفل لما يجي واعمل له الاستمارة ، فلاحظت ان اطفال كتيرة جداً اسماءها على اسم جدها او جدتها ، والأسم كتييييييير اوي ما بيعرفوش ينطقوه .. كمان الأهل بينادوا لهم باسم تاني خالص لأنهم شايفين ان الاسم دا تقبل اوي

أما دعاء - مدرسة في حضانة - قالت لنا : في يوم ولي أمر جه يزعق لي ويقول لي ما تندهيش لبنتي باسم صفية تاني علشان بتزعل قولت له لكن دا اسمها يا افندم قال لي لأ احنا مش بننده لها بالاسم دا وقال لي اسم تاني خالص .. فسألته طيب ليه لما انتوا مش حابين الاسم سمتوها كده قال لي علشان جدتها عايزة كده

****

مش بنقول خالص ان الاسامي دي وحشة ولا حاجة .. لكن كلنا عارفين انه مش وقتها .. وكمان تقيلة جداً على لسان الطفل واحياناً باقي الأطفال بيضايقوه فيكره نفسه واسمه وابوه وامه وجده كمان

والغريب كمان ان لسة في اهالي بتسمي اولادها بأسماء غريبة علشان يعيشوا او علشان ما يتحسدوش ... او مثلاً يسموا الولد على اسم الدكتور اللي ساعد الأم في عملية الولادة

المشكلة ان الاهالي لما بتعمل كده وتسمي ابنها على اسم اي حد كنوع من المجاملة

مش بيفكروا أبداً في الأثر النفسي السيء للاسم دا على الطفل ..

في دراسات كتيرة اكدت ان لما الطفل بيكون اسمه وحش دا بيأثر عليه

بالسلب وبيخلي الطفل عنده احساس بالحقارة ودايماً يتكسف يقول اسمه

ولما يكبر بيكون ساخط على نفسه وعلى اسرته وبيكره الانسان اللي اتسمى على اسمه

لأنه بيحس انه هو السبب

كمان لما بيعملوا كده ويسموا ابنهم أي اسم وكأنه "شيء " من ممتلكاتهم ،

بينسوا أمر الرسول عليه الصلاة والسلام لما قال في حديث شريف

« من حق الولد على الوالد أن يحسن اسمه ويحسن أدبه »

صدق رسول الله صلى الله عليه وسلم

نشر في مجلة بحلقة بتاريخ 2 اغسطس 2008

عندما تكون حديقة الطفل .. للكبار فقط !!

لما شوفنا حديقة الطفل في طنطا ، فرحنا أوي .. ما هي حاجة تفرح بصحيح .. قد كده مهتمين بالطفل ؟؟! الجونينة خضرااااااااااا وفي مكان هااااااااااااادي وواسعة إلى حد ما وفيها مراااااااااجيح .. والدخول مجااااااااااااني والدنيا كلها زي الفل

قولنا دا مكان مثالي فعلاً لو عايزين نفسح اخواتنا ، او عايزين نعمل خير ونخرج الأطفال الأيتام و...... و...... و ........ إلخ إلخ ..

لكن أول ما قولنا لناس من اللي عارفين طنطا كويس ، قالوا لنا : انتوا بتهزروا صح ؟ قولنا لأ بنتكلم جد .. قالوا لنا : جد ايه ؟؟ حديقة الطفل هنا للكبار فقط!!

فطبعاً كان لااااااااااااازم نسأل ليه ، فقالوا لنا ..

علي الشريف قال لنا : " الأصل أن حديقة الطفل كانت عشان الأطفال بديهياً يعني ..

لكن بمرور الوقت اختفى الأطفال - معرفش راحوا فين - و ظهر بدالهم الحبيبة
كانت ظاهرة منتشرة جدا في 2002 -2007 تقريباً

و كان البداية مجرد حب عادي زي مقابلات جنينة الأسماك و الأفلام القديمة
بس تطور الأمر خاصة بعد - فضايح مدرج كلية تجارة- و ما كان يحدث فيه من مناظر خليعة
المهم بعض الشباب لقوا في حديقة الطفل ملاذا للبعد عن عيون الناس
و نظرا لأنها في بداية الأمر كانت منعزلة عن الناس و منطقة غير كثيفة بالسكان فكانت مكانا مثالي وآمن ليهم - علشان يتحرروا من أي ضغوط عليهم - و يبقوا (فري ) - لكن لما انتشر السكان الرجل خفت شوية و بقى الدخول في الحديقة مابقاش جايب همه .. لكنهم ما انهزموش و بكل بجاحة رجعوا تاني يكملوا مسيرة الكفاح "

و أحمد قال لنا : " شفت ناس كثير "يتبادلون القبل " في حديقة الطفل سواء في النهار أو في الليل عااااادي

وسمعت عن أكتر من كده لكن ما شوفتش بنفسي ، واللي اعرفه ان مستوى الحديقة

و مش بس في الحديقة دا كمان في المنطقة المحيطة بيها

وصل لما فوق " القبل " والحديقة بقت ملجأ للمدمنين وعشاق المخدرات ،

وكمان في سرقات كتيرة جداً في المنطقة اللي جنب الحديقة "

وفي مصدر رفض تماماً ذكر اسمه أكد لنا انه بيشترك مع اصحابه في شرب المخدرات فيها بالليل

احنا بجد مش عارفين فين الشرطة اللي المفروض تعمل دوريات خاصة في المناطق المقطوعة دي .. والجهة اللي عملت الحديقة دي ما تمتش جميلها ليييييييه وحطت حارس على باب الحديقة دي ليه ؟؟ مش لازم الدخول يبقى مجاني يعني .. وموااااااااقين تعملوا تذاكر .. مش مشكلة لو التذاكر ضريبة الأمان موافقين

والأهالي بتوع المنطقة دي ما نعرفش مستحملين الوضع دا ازاي ؟؟ المفروض يبلغوا عن البلاوي اللي بتحصل دي ويطالبوا بحل لأن ممكن جداً ابنهم او بنتهم يبقوا من رواد الحديقة المحترمة دي

بحلقة ترصد : أغرب جروبات الفيس بوك

ممكن جداً تكون بتتمشى في الفيس بوك وتلفت نظرك صورة حاجة مش غريبة عليك ، وفي ثانية هتدرك أن الصورة دي ولا مؤاخذة يعني صورة قاعدة التواليت اللي بتشوفها كل يوم لا مؤاخذة يعني في حمام بيتكم .. فتندهش شوية كده وتبص على اسم الجروب .. تلاقيه بيطالبك بإنك - ولا مؤاخذة بردو - ترفع قاعدة التواليت !!
خلي بالك .. دا مش أغرب جروب هيقابلك على الفيس بوك .. اللي يعيش ياااااااااما يشوف ، واللي يدخل الفيس بوك يشوف أكتر :)
بحلقة رصدت لكم أغرب جروبات الفيس بوك اللي ممكن تقابلها .. وأكيد هنبدأ بجروب - لا مؤاخذة يعني - ارفع قاعدة التواليت .. الجروب دا يا سيدي اللي عمله قال انه عمله للسبب الآتي :
" بصراحة احنا قـــــــــرفنا من كل الحمامات العامه تلاقي القاعدة فيها مش نضيفة
حتي في الأماكن المحترمه تلاقي حاجات غريبة على القاعدة
يعني أنت حتخسر أيه لو رفعت القاعده بعد ما تخلص الأجتماع المغلق الطارئ بتاعك !؟!؟! حتي علشان صحتك و الصحه العامة
بالمره يا ريت ننزل السيفوووووون مش حيدفعوك فتورة الميه و الله بليززز يعني
حتي في بيوتنا يا جماعة المفروض نرفع القاعدة
زي ما أنتوا عارفين في ناس بتحب تناقش وهي واقفة و في ناس و هي قاعدة :D
فلازم قاعدة المؤتمرات تبقي دايماً نضيفة "
تاني جروب شوفناه هو جروب " اللي ورا يبعت " واللي صاحبه بدأ وصفه بانه عايز زقة ، ايد معانا يا كابتن وأيدك معانا يا مزمازيل
وبعد كده بيتكلم عن اللي خلاه يعمل الجروب دا فقال " اللي خانفني في عيشيتي الميكروباص والميني باص وهيئة النقل العام كلها .. السواق من دول فاكر نفسه سايق تريلا و دايس على البني آدمين ، كل همه الأجرة واللي ورا يبعت وبس .. إنما خبط مين كسر على مين هبب أيه ؟؟ مالوش هو دعوة "
هنسيب دا ونروح نشوف الجروب دا بقى .. الجروب عنوانه " مافيش جروب " في الأول افتكرنا أن الجروب دا كان جروب وبعدين اتلغى
فسماه صاحبه مافيش جروب ، لكن لما دخلنا أكتشفنا أن صاحب الجروب دا " طيب جوي جوي يا خال " واصف الجروب كالأتي " ده جروب فاضى بيهدى الأعصاب وكل اللى بيدخلوا معرفش ليه بيتوتر وأعصابه بتبوظ ومش بيهدا خالص ونعم الأهداف والله يا ابني ..ده إحنا اللي بنقول "

والله الجروب دا على الأقل يبقى مريح لا رسايل كل يوم تغرق الأينبوكس ولا يحزنون .. بس تبقى مصيبة لو كان بيبعت رسايل فاضية
نسيب الجروب المريح دا بقى ونشوف جروب " رابطة محبي اللون الازرق" معمول ليه ؟؟
صاحب الجروب بصراحة صريح ، وقال أن الفكرة طقت في دماغه كده فجأة علشان لقى كل الناس بتعمل جروبات فقال اشمعنى أنا !!
فقال يعمل جروب محبي اللون الأزرق .. لو كنت منهم ما تترددش الأزرق هناك كتييييييييييرر
ولنفس السبب اللي فوق ، اللي هو " كل الناس عملت جروب أشمعنى أنا " اتعمل الجروب دا
وهو بردو معمول لمجرد الرغبة في عمل جروب وأهو جروب يفوت ولا حد يموت
بعد ما شوفت بعينك قول لنا بقى إيه رأيك في الجروبات دي وأفكارها ؟؟
وايه رأيك في أن الناس بتعمل جروب لمجرد بس أن " الناس كلها عملت جروب رافعين شعار أشمعنى أنا " ؟؟
وأيه ياترى أغرب جروب شوفته على الفيس بوك ؟؟